فره گێڵایمێ ئی هه‌رد په‌ی ئه‌و هه‌رد

دوور جـــه‌ ئازیزا عــه‌مـــرما ویــه‌رد

ســه‌یه‌کــێ یاوه‌ی پاینــوو گۆلاوا

واده‌و دمــا گــه‌لــه‌و نازارا یــاوا

غه‌ریب که‌وته‌نا جه‌ گۆشه‌ی شاران

کـــه‌س نیــا به‌رۆم ته‌وافــی یاران

سڵام ئازیزا چن دانێ کوڵه‌ په‌یامێ که‌ چی به‌ینه‌نه‌ په‌یشا کیاسته‌نا پێشکه‌ش به‌ شمه‌ :

ئازیز گه‌لاوێژ شه‌وقش دان وه‌ڵات

چوون جاری جاران که‌ردیمێش خه‌ڵات

شن شن هه‌وای وه‌ش مه‌شنیۆ شه‌وان

سوه‌یلش ڕه‌شته‌ن په‌ی شیرین خه‌وان

* * * * * * * *

تا کاسه‌ی چه‌مان په‌ڕ نه‌بۆ جه‌ خاک

تا پێشه‌ی لاشه‌م نه‌پوویۆ سه‌ر پاک

هه‌تا جمجمه‌ی سه‌ری سه‌رداران

نه‌بۆ ئامێته‌ی لیتاوی واران

هه‌تا ئیسرافیل ده‌س به‌ کار نه‌بۆ

تا شاذی ده‌وران زه‌هری مار نه‌بۆ

نام نامی تۆن جه‌ سه‌ر زوانم

نه‌خشی مه‌حبووبیت جه‌ ڕۆح و گیانم

* * * * * * * *

وێمانه‌ واچه‌ قسه‌ و باسه‌که‌ت

برمانه‌ به‌ دۆس به‌ین و تاسه‌که‌ت

وێمانه‌ گنه‌ شۆنه‌و زانایی

با یاوی ئامانج ئاوات واسه‌که‌ت

* * * * * * * *

قیبله‌م وه‌فای تۆ گه‌نجی شاهانه‌ن

په‌یامت جارجار جه‌ لام مێمانه‌ن

کام گوڵ کام ڕێحان که‌روو فه‌رشی پات

وه‌شڵه‌ی پا که‌سیه‌ وه‌شه‌ویسا لات .

* * * * * * * *

منویسوو به‌ دڵ مه‌باره‌ک باذی

جه‌ژنه‌کێت پیرۆز به‌ شه‌وق و شاذی

ئازیزم یا خوذا خاتر‌ت شاذ بۆ

جه‌ژنه‌کێت پیرۆز ناحه‌ز به‌رباذ بۆ

وه‌هارێو وه‌شا چنی یاری بی

چنی دڵبه‌ری بێ قه‌راری بی

به‌ڵام من ئیسه‌ دوور جه‌  ئازیزی

وسته‌ناش کۆنجوو که‌یڵوو پایێزی

                                       پێشکه‌شی کاکه‌ سابیر  سه‌عیدی         
   

************************

سڵامێو به به‌رزی باڵای شاهۆ کۆ

به جوانی باڵای نه‌مامانی نۆ

ئامێته چه‌نی گوڵانی وه‌ش بو

مده‌وش وای شه‌ماڵ باوه‌رۆش په‌ی تۆ

 مۆرته‌زا فه‌یزی (هاوار)

http://paigalanvasher.blogfa.com/

************************

**************

شاهۆ و کۆساڵان گۆششا چه‌نه‌ بۆ

کوڕی مریه‌میچ حه‌تمش وه‌نه‌ بۆ

هه‌ر هه‌ورامیێ لادۆ جه‌ زوانیش

مه‌رده‌و مه‌زارین هه‌ر چن مه‌نه‌ بۆ

(محه‌مه‌د فه‌هیم)

**************

کاکه‌م سوار بۆ منیچ هه‌ر به‌ په‌ی

ئاد ئه‌سپی تاو دۆ منیچ به‌ ڕه‌مه‌ی

ئاد یانه‌ وه‌ی بۆ منیچ سواڵکه‌ر

ئاد قه‌ڵه‌م به‌ده‌س من شونکه‌وته‌ی هه‌ر

هه‌ر واچوو براما به‌ نه‌زانانه‌

ئه‌ر ئینه‌ برایین تووته‌م تڕنانه‌

(محه‌مه‌د فه‌هیم)

**************

ئازیز مۆژده‌ بۆ وه‌هاره‌ن جه‌ نۆ

واده‌ی سه‌یرانه‌ن عه‌مرێ باقی بۆ

قاسپه‌ی ژه‌ره‌ژان جه‌ به‌رزه‌ شاخان

بۆی چنووری جوان وه‌نه‌وشه‌ی باخان

چریکه‌ی بڵبڵ و و قره‌ی قه‌ناری

جوانته‌ر  ڕازنانشه‌و فه‌سڵه‌و وه‌هاری

به‌هه‌ر حاڵ قیبله‌م وه‌هاره‌ن جه‌ نۆ

هه‌رچی جوانیه‌ن پێشکه‌ش بۆ به‌ تۆ

**************

ته‌مه‌ت مه‌بڕوو هه‌تا مه‌نه‌نا

مه‌ر لاشه‌م بنیا چیروو ته‌وه‌نا

*******************

ئاسمانی به‌رزم گه‌رد و غۆباره‌ن

دڵ تاسه‌ی تۆشه‌ن ته‌مام عه‌مباره‌ن

وه‌هارم بێ تۆ چوون هه‌وری ماته‌ن

دڵه‌ی برێژیام دایمه‌ جه‌ لاته‌ن

*******************

فکر و خیاڵم وه‌فای یارانه‌ن

پووشی دڵ پڕان ته‌ژنه‌ی وارانه‌ن

وارانی وه‌فات با نم نم وارۆ

با دڵ نه‌تۆریۆ دیده‌ خه‌م نارۆ

********************

ئازیزا و وه‌شه‌ویسا گردێتا مزاندێ  په‌یام کۆتا (مسه‌یج) نه‌قشێوی پڕ ڕه‌نگش‌‌ ‌‌‌‌‌‌‌هه‌ن جه‌ پێوه‌نی به‌ینوو خه‌ڵکوو ئارۆیه‌نه‌ . ئارۆ ئی په‌ڕوو دنیای په‌ی ئه‌وپه‌ڕوو دنیای به‌ کوڵه‌ په‌یام متاومێ مه‌به‌ستوو وێما بیاونمێ . به‌ تایبه‌ت جه‌ جه‌ژنه‌کانه‌ و وه‌ختوو مه‌باره‌ک بادی و په‌ی دڵوه‌شی دای وه‌ختوو خه‌فه‌تی و هه‌ر پاسه‌ هه‌ر وه‌ختێو دڵما په‌ی یه‌کترینی ته‌نگ بۆ ، ئی خاڵێ فره‌ته‌ر دیاریێنێ .

 ئیمه‌ جه‌ کوڵه‌ په‌یامه‌نه‌ هه‌ست و ئێحساسوو وێما نیشانه‌ مده‌یمێ و چ زوانێو بێجگه‌ جه‌ زوانی شیرێنی ئه‌ذایی متاوۆ ئی هه‌ست و ئێحساسیه‌ به‌ زه‌ریفته‌رین ڕوه‌ برمانۆ ؟

په‌س ئازیزا ئیسه‌و لای په‌ی بره‌و دای به‌ زوانی هه‌ورامی هه‌ر که‌س به‌ توان و وسعوو وێش کوڵه‌ په‌یامێوه‌ کیانو تا ئی په‌لیانێ بۆ به‌ سه‌ر چه‌مێو په‌ی ‌ئا که‌سا گه‌رکشانا چنی یه‌کترینی به‌ هه‌ورامی پێوه‌نی گێرا.