*********************

شه‌راوم نۆ مزگییه‌و  پاوه‌ی که‌رده‌بۆ ، ئی ده‌حفه‌ بژنه‌وو  ئی هه‌تیم سەرۆئەوەنیا‌ چه‌نی ئا سه‌ڵیتێ قسێش که‌ردێنێ ، پا توه‌رداسیه‌ مه‌پاچووشه‌ره‌.

هه‌ندیێوه‌ش له‌و ده‌س وره‌شه‌کرماشانیه‌کانۆ ئه‌سه‌بێ و نیابێش لێ ده‌سه‌سه‌ڕه‌ هه‌ورێشمه‌که‌و ده‌سیش نیاشه‌ره‌ ، نه‌وچاوش دابێ پێوه‌ره‌ ، وەروو وێشەرە بۆڵەبۆڵ کەرێ که‌س نیارێ وه‌رش ورته‌ که‌رۆ.

پیاکه‌، جوانه‌ن، خۆ سه‌ره‌ نمه‌وڕیۆ په‌یمان، چێشش په‌نه‌ که‌رم؟

ئی قسێ ئه‌ده‌یمه‌ یه‌کجاری بابه‌مش که‌رد گه‌نمه‌و سه‌روو ساجی.

هه‌ر تۆ  پێسه‌ په‌نه‌ که‌رد، ئینده‌ واتۆ : جوانه‌ن بازه‌ش،  تا هه‌ڕه‌ت دا سه‌ره‌شه‌ره‌، هه‌ر فوکولیێش وه‌شێ که‌ردێ و گجیێ باڵ ڕووتێش که‌ردێنه‌ و یه‌خێش وه‌ره‌دا، واتۆ وه‌شۆ په‌نه‌ مه‌گنۆ تا ڕۆش یاوا  ئارۆ . خودام به‌ هیچ دینێوه‌ نه‌پرسابۆ ، ئا فوکلیێشه‌ به‌ ئیورینگی مه‌پاچووره‌، ئی ده‌حفه‌ گجی باڵ ڕووت که‌رۆنه‌ و  یانه‌نه‌ بزیۆره‌، په‌یش مه‌که‌روو خرخاڵ.

ڕۆڵه‌ بۆ نانه‌کێت بوه‌ره‌،ئه‌دایم په‌نه‌ واتان.

سڵاموو بابه‌یم که‌ردم به‌ تێڕه‌یوه‌ دیا په‌یم،تۆ چێنه‌ جواوۆ داوه‌ ئاد نامۆ گۆ.

یه‌واشه‌ی به‌ ئه‌ده‌یم واتم هه‌م ته‌ماتی سوورۆ کریایما هه‌نێ.

بابه‌م ئامۆ جواو: موه‌ری هه‌ر ئینه‌نه‌ نموه‌ری قرزه‌ڵقۆرتۆ وارده‌،ژه‌نه‌کێ ئا لوه‌ سیره‌کوێوه‌ به‌وره‌ بنیه‌ وه‌روو ده‌میش با ئینده‌ بلێسۆشۆ تا ڕۆخۆڵه‌یش به‌ربیان.

که‌وتانه‌ی یادوو ئادێ،ئینه‌ ئه‌من ئه‌دام هه‌نه‌ جارجاره‌ی په‌شتیم مه‌گێرۆ،ئینه‌  وه‌ره‌مه‌نه‌،خۆ ئاده‌ ئه‌ده‌یچش نییه‌نه،باواژەنیچش سەروو هیچی تاوەی نە تاوەی مەکەرۆش بەنی کەوۆ.

پڵۆمه‌ی گرتان، ده‌سم که‌رد گره‌وه‌ی.

چل ساڵێن ژه‌نوو شوێنم تا ئیسه‌ نامێ یه‌کترینیما نه‌ده‌ینه‌((ئیسه‌یچه‌ ئه‌دام به‌ بابه‌یم ماچۆ(ئاد) بابه‌یچم به‌ ئه‌ده‌یم ماچۆ(ژه‌نه‌کێ))).هیزی لێ گه‌له‌ بێره‌یه‌نه‌ دێ(سه‌عدا)گۆشش چه‌نه‌ بییه‌ن ئی گونه‌گێسکه‌ نامێ ئا سه‌ڵیتێشه‌ ده‌ینه‌و واته‌نش وه‌شم مه‌ی وه‌نه‌ت.

ئیسه‌ زانام بابه‌م پچی پاسه‌ ئه‌یر که‌رێوه‌،به‌ خودا وێم ده‌موو دێ سه‌عده‌یوه‌ ئه‌ژنه‌ویه‌نم په‌ی ژه‌نان قسێ که‌رێ،واچێ:شوه‌که‌م فره‌ وه‌شش ئامه‌ن وه‌نه‌م،تا غایه‌ته‌ی وه‌خته‌ی شوه‌که‌ش مه‌رده‌بێ سه‌روو زیاره‌تیوه‌ گره‌وێ و واچێ ئاغه‌که‌م پچی ئاسانێت جیا؟.

وه‌لحاسڵ ناسشا بیاوم یه‌کترینی،ئاده‌ وێش سۆچنا و ئه‌منیچ سه‌ره‌و وێمم هورگرت،شه‌رته‌م به‌سه شۆنه‌و ئادێره‌‌ تا ئا ڕۆ مه‌نێنان به‌ که‌سی نواچوو وه‌شه‌م گه‌ره‌که‌نی!!!!!

مانگه‌ی چی وه‌ڵی چه‌نی بابه‌یم قسێ که‌رێنێ ماچۆ ڕۆڵه‌ ڕه‌فێقێ تۆ کوڵ ژه‌نیشا ئه‌ورده‌ و زه‌وڕۆشا بی و یانه‌شا نیا قننۆ،ئه‌ی تۆ تا که‌ی گه‌ره‌کته‌ن ته‌نیا و هه‌ناسه‌ سه‌رد بی؟

واتم بابه‌ گیان ئینه‌مه‌ په‌نه‌ وه‌شه‌ن تا چه‌نی یۆی بژیوو زیڵیش چه‌نه‌م بشیویۆوه‌ یا زیڵیم چه‌نه‌ش بشیویۆوه‌.

*************************

ئی داستانێ په‌ی‌ هه‌مامه‌و کوڵه‌داستانێ هه‌ورامیێ کیانیاینه‌ به‌ داخه‌وه‌ نویسه‌ره‌که‌ش وێش نه‌ژناسنا . به‌ په‌یلواو من یۆ جه‌ داستانه‌ عاله‌کا بێ که‌ ئه‌رزشوو هۆرچنیایش بێ. من سپاسوو ئی ئازیزه‌یه‌ که‌روو و هێواو سه‌رکه‌وته‌یم هه‌نه‌ په‌یش .